జాతకాన్ని గూర్చి, నాడీగ్రంథాలను గూర్చి ఒకమారు భక్తులు చర్చిస్తుంటే ఒకరి ప్రశ్నకు సమాధానంగా రమణ మహర్షి - ‘‘నేను స్కందాశ్రమంలో ఉండగా జటాస్వామి ఒక వ్యక్తిని చూశారు. అతను హస్తసాముద్రికంలో, జాతకం చూసి చెప్పడంలో నేర్పరి అట. ఆయన జటాస్వామి జాతకం చూశాడట. జటాస్వామికి చాలా నచ్చాడు. జటాస్వామి ఆ సాముద్రికుణ్ణి నా దగ్గరకు పిలుచుకుని వచ్చి ఈయన సాముద్రికంలో, జాతకం చూసి చెప్పడంలో గొప్పవాడు. మనం ఎంత ఖర్చుపెట్టినా ఇలాంటివాడు దొరకడు. ఆయన చెప్పినవన్నీ సరిగ్గా ఉంటాయి. ఆయనగా మన దగ్గరకు రావడం మన అదృష్టం. మీ చెయ్యి చూపండి, మీ భవిష్యత్తంతా ఆయన చెప్తాడు’’ అన్నాడు. నేను చూపలేదు. జటాస్వామి ఎంత నచ్చచెప్పటానికి ప్రయత్నించినా నా చెయ్యి చూపలేదు. పైగా నేను ‘‘మనకు వర్తమానమే తెలీదు. ఇక భవిష్యత్తును గురించి ఆరాటం ఎందుకు?’’ (పేజీ 179-180 అనుదినమును రమణులతో) అన్నాను.

గత జన్మను గూర్చి, పునర్జన్మను గూర్చి, మరణానంతర స్థితిని గూర్చి కొందరు మహర్షిని అడిగేవారు. అలాంటి ప్రశ్నే వేసిన గజేంద్ర మెహతాతో ‘‘ప్రస్తుతాన్ని తెలుసుకుంటే భవిష్యత్తును తెలుసుకుంటావు. ఎవరికీ ఏ అనుమానమూ లేని ప్రస్తుతాన్ని తెలుసుకోవడానికి ఇష్టపడనివాళ్ళు, తెలీని గతాన్ని, భవిష్యత్తును తెలుసుకోవడానికి ఎంతో ఆరాటపడతారు’’ (పేజీ 320 - అనుదినమును రమణులతో) అని మహర్షి చెప్పారు.

మానవుడికి ఈశ్వరుడు ఎంతో జ్ఞానం ఇచ్చాడంటూ, ‘‘భవిష్యత్తు జ్ఞానమే తప్ప, రాబోయే నిమిషం సంగతి కూడా తెలియదు అతనికి’’ అంటారు రమణమహర్షి (పేజి 88 - భగవాన్ స్మృతులు). జ్యోతిష్యాన్ని గూర్చిన తలంపులుదయిస్తే దాన్ని మానసిక రుగ్మతగా భావించి వెంటనే వైద్యుని సంప్రదించి మంచి నిద్రాహారాలను తీసికొమ్మని సలహా ఇస్తాడు వివేకానందస్వామి. గ్రహ, నక్షత్ర రాశులను మింగివేయగల రూపమేనట మన స్వస్వరూపము! అంతర్ముఖులై ఆ స్థితిని చేరుకుందాం. గ్రహబలాన్ని మించిన ఆధ్యాత్మిక బలాన్ని పొందుదాం. రమణులు చేసిందీ, చెప్పిందీ అదే. చివరకు ఆయన సాధించిందీ అదే. దేన్ని తెలుసుకుంటే ఇక తెలుసుకోవలసింది ఏది ఉండదో, దాన్ని ఆయన తెలుసుకున్నారు, మనలను తెలుసుకోమన్నారు.


courtesy by Sakshi